"ମୋ' ସ୍କୁଲ" ଟିମ୍‌

“ମୋ’ ସ୍କୁଲ” କେନ୍ଦ୍ରୀୟ ଟିମ୍‌ରେ ରହିଛନ୍ତି ସ୍ବନାମଧନ୍ୟ ଜାତୀୟ ଓ ଅନ୍ତର୍ଜାତୀୟ ସ୍ତରର ସଂଗଠନରୁ ଆସିଥିବା କେତେକ ଅଭିଜ୍ଞ ବ୍ୟକ୍ତି। ସେମାନେ ଶିଶୁର ଜୀବନ ଗଢିବା ଓ ବିକାଶ ଦିଗରେ ଶିକ୍ଷାର ରହିଥିବା ଗୁରୁତ୍ୱପୂର୍ଣ୍ଣ ଭୂମିକାକୁ ସ୍ୱୀକାର କରନ୍ତି।

“ମୋ’ ସ୍କୁଲ” କେନ୍ଦ୍ରୀୟ ଟିମ୍‌ରେ ଜଣେ ସଦସ୍ୟ ସଚିବ ଓ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (ଏମ୍‌ଏସ୍‌ ଓ ସିଇଓ) ଅଛନ୍ତି। ତାଙ୍କୁ ସାହାଯ୍ୟ କରିବା ପାଇଁ ଅଛନ୍ତି ଜଣେ ମୁଖ୍ୟ କାର୍ଯ୍ୟକାରୀ ଅଧିକାରୀ (ସିଓଓ), ଯିଏ କି କାର୍ଯ୍ୟକ୍ରମର ପରିଚାଳନା କରନ୍ତି। ଏହା ସହ ଅଛନ୍ତି ଜଣେ ସ୍ୱତନ୍ତ୍ର ଦାୟିତ୍ୱ ଅଧିକାରୀ (ଓଏସ୍‌ଡି), ଯିଏ କି ମୋ ସ୍କୁଲର ଆର୍ଥିକ ତଥା ନିୟମିତ ଶାସନରେ ସହାୟତା କରନ୍ତି।

ସଦସ୍ୟ ସଚିବ ଓ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଅଧ୍ୟକ୍ଷ/ଅଧ୍ୟକ୍ଷା ଓ ଉପାଧ୍ୟକ୍ଷଙ୍କୁ ରିପୋର୍ଟ କରନ୍ତି। ଜଣେବିଶିଷ୍ଟ ବ୍ୟକ୍ତିଙ୍କୁ ରାଜ୍ୟସରକାର ଅଧ୍ୟକ୍ଷ/ଅଧ୍ୟକ୍ଷା ଭାବରେ ନିର୍ବାଚନ କରନ୍ତି। ସ୍କୁଲ ଓ ଗଣଶିକ୍ଷା ବିଭାଗର କମିସନର୍‌ ତଥା ସଚିବ ଏହାର ଉପାଧ୍ୟକ୍ଷ। ଓଡ଼ିଶା ପ୍ରାଥମିକ ଶିକ୍ଷା କାର୍ଯ୍ୟକ୍ରମ କର୍ତ୍ତୃପକ୍ଷ (ଓସେପା)ର ରାଜ୍ୟ ପ୍ରକଳ୍ପ ନିର୍ଦ୍ଦେଶକ ଏହାର ସଦସ୍ୟ ସଚିବ ଓ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ।କେନ୍ଦ୍ରୀୟ ଟିମ୍‌ ଓଡ଼ିଶା ସରକାରଙ୍କ ସ୍କୁଲ ଓ ଗଣଶିକ୍ଷା ବିଭାଗ ଏବଂ ଏହାର ବିଭିନ୍ନ ଶାଖା ଯଥା ସର୍ବ ଶିକ୍ଷା ଅଭିଯାନ, ଓଡିଶା ଆଦର୍ଶ ବିଦ୍ୟାଳୟ ସଂଗଠନ ଏବଂ ରାଜ୍ୟ ଶିକ୍ଷା ଓ ଗବେଷଣା ପରିଷଦ (ଏସସିଇଆର୍‌ଟି) ସହ ସମନ୍ଵୟରକ୍ଷା କରି କାର୍ଯ୍ୟ କରନ୍ତି।

କେତେଜଣ ସରକାରୀ ଅଫିସର୍‌, ଯଥା ଓଡ଼ିଶା ଶିକ୍ଷା ସେବା (ଓଇଏସ୍‌)ଅଧିକାରୀ, ଓଡ଼ିଶା ଟିକସ ଓ ଲେଖା ସେବା (ଓଟିଏଏସ୍‌)ଅଧିକାରୀ, ସେକ୍ସନ୍‌ ଅଫିସର, ପ୍ରଶାସନିକ ସହକାରୀ କର୍ମଚାରୀ- ଏହି କେନ୍ଦ୍ରୀୟ ଟିମ୍‌ ସହ ମିଶି କାର୍ଯ୍ୟ କରନ୍ତି ।

"ମୋ' ସ୍କୁଲ" କେନ୍ଦ୍ରୀୟ ଟିମ୍‌



"ମୋ' ସ୍କୁଲ" ପ୍ରଶାସନିକ ପରିଷଦ

“ମୋ’ ସ୍କୁଲ”ର ଅଧ୍ୟକ୍ଷା ପ୍ରଶାସନିକ ପରିଷଦ(ଜିସି)ର ମୁଖ୍ୟ।

ସ୍କୁଲ ଓ ଗଣଶିକ୍ଷା ବିଭାଗର ପ୍ରମୁଖ ଶାସନ ସଚିବ ଏହାର ଉପାଧ୍ୟକ୍ଷ ଏବଂ ଓଡ଼ିଶା ପ୍ରାଥମିକ ଶିକ୍ଷା କାର୍ଯ୍ୟକ୍ରମ କର୍ତ୍ତୃପକ୍ଷ (ଓସେପା)ର ରାଜ୍ୟ ପ୍ରକଳ୍ପ ନିର୍ଦ୍ଦେଶକ ଏହାର ସଦସ୍ୟ ସଚିବ। ପ୍ରଶାସନିକ ପରିଷଦର ସଦସ୍ୟମାନଙ୍କ ମଧ୍ୟରେ ଅନ୍ତର୍ଭୁକ୍ତ ଅଛନ୍ତି ସ୍କୁଲ ଓ ଗଣଶିକ୍ଷା ବିଭାଗର ଅତିରିକ୍ତ ସଚିବ, ଅନୁସୂଚିତ ଜାତି ଓ ଜନଜାତି ବିଭାଗର ନିର୍ଦ୍ଦେଶକ, ସ୍କୁଲ ଓ ଗଣଶିକ୍ଷା ବିଭାଗର ଅର୍ଥନୈତିକ ଉପଦେଷ୍ଟା, ୩ ଜଣ ଜିଲ୍ଲାପାଳ, ମୋ ସ୍କୁଲର ସ୍ୱତନ୍ତ୍ର ଦାୟିତ୍ୱ ଅଧିକାରୀ (ଓଏସ୍‌ଡି), ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (ସିଇଓ), ମୁଖ୍ୟ କାର୍ଯ୍ୟକାରୀ ଅଧିକାରୀ (ସିଓଓ) ଏବଂ ୩ ଜଣ ମନୋନୀତ ସଦସ୍ୟ।

ପ୍ରଶାସନିକ ପରିଷଦ ପ୍ରତି ତିନିମାସରେ ଥରେ ଏକାଠି ହୁଏ। ସିଇଓ ପ୍ରତି ବୈଠକରେ ହୋଇଥିବା ଆଲୋଚନା ଓ ନିଷ୍ପତ୍ତିକୁ ନେଇ ଏକ ବିବରଣୀ ପ୍ରସ୍ତୁତ କରନ୍ତି ଏବଂ ତାହାକୁ ଅଧ୍ୟକ୍ଷ/ଅଧ୍ୟକ୍ଷାଙ୍କ ମଂଜୁରୀ ପାଇଁ ପଠାନ୍ତି।

ପ୍ରଶାସନିକ ପରିଷଦର ଭୂମିକା ଓ କାର୍ଯ୍ୟାବଳୀ:

  • “ମୋ’ ସ୍କୁଲ ଅଭିଯାନ”ର ଲକ୍ଷ୍ୟ ଓ ଉଦ୍ଦେଶ୍ୟକୁ ଆଗକୁ ବଢାଇବା ପାଇଁ ପ୍ରଶାସନିକ ପରିଷଦ ବାର୍ଷିକ କାର୍ଯ୍ୟବିଧି ଓ ଯୋଜନା ପ୍ରସ୍ତୁତ କରନ୍ତି।
  • ପ୍ରଶାସନିକ ପରିଷଦ ଆବଶ୍ୟକସ୍ଥଳେ କାର୍ଯ୍ୟକାରୀ ପରିଷଦ ଦ୍ୱାରା ପଠାଯାଇଥିବା ପ୍ରକଳ୍ପ ପ୍ରସ୍ତାବଗୁଡ଼ିକର ସମୀକ୍ଷା କରି ମଂଜୁରୀ ଦେଇଥାଏ।
  • ଓଡ଼ିଶା ସରକାରଙ୍କ ନିୟମ କାନୁନ ଅନୁସାରେ ମୋ ସ୍କୁଲର ପାଣ୍ଠି ଓ ସଂପତ୍ତିର ପରିଚାଳନା କରନ୍ତି ଓ ଆବଶ୍ୟକସ୍ଥଳେ ବିଭିନ୍ନ ପାଣ୍ଠି ସଂଗ୍ରହ ଓ ବ୍ୟୟ ଲାଗି ସ୍ୱଚ୍ଛତାର ସହ ପଦ୍ଧତି ନିର୍ଦ୍ଧାରଣ କରନ୍ତି।
  • ଗୋଟିଏ ଆର୍ଥିକ ବର୍ଷ ପାଇଁ ବଜେଟ ପ୍ରଣୟନ କରନ୍ତି। ସେହି ବର୍ଷ ପାଇଁ ସଂଶୋଧିତ ବଜେଟ ଅଟକଳ ପ୍ରସ୍ତୁତ କରନ୍ତି ଏବଂ ସ୍କୁଲ ଓ ଗଣଶିକ୍ଷା ବିଭାଗ ମାଧ୍ୟମରେ ରାଜ୍ୟ ସରକାରଙ୍କ ମଂଜୁରୀ ପାଇଁ ପଠାନ୍ତି।
  • “ମୋ’ ସ୍କୁଲ”ର ବାର୍ଷିକ ରିପୋର୍ଟ ଓ ହିସାବର ଅଡିଟ୍‌ ରିପୋର୍ଟକୁ ମଂଜୁରୀ ଦିଅନ୍ତି।
  • “ମୋ’ ସ୍କୁଲ”ର କାର୍ଯ୍ୟ ସଂପର୍କରେ କିମ୍ବା ଏହି ସଂଗଠନ ସଂପର୍କରେ ବିଶେଷଜ୍ଞ ମତାମତ ପାଇଁ କମିଟି, ପରାମର୍ଶଦାତା, ଅଧ୍ୟୟନ ଗୋଷ୍ଠୀ ବା କାର୍ଯ୍ୟ ଗୋଷ୍ଠୀ ନିଯୁକ୍ତ କରେ।
  • ସ୍କୁଲ ଓ ଗଣଶିକ୍ଷା ବିଭାଗର ପରାମର୍ଶରେ ବିଭିନ୍ନ ପ୍ରକଳ୍ପକୁ କାର୍ଯ୍ୟକାରୀ କରିବା ପାଇଁ ମାନକ କାର୍ଯ୍ୟବିଧି ନିର୍ଦ୍ଧାରଣ କରେ।
  • ଅଧ୍ୟକ୍ଷ/ଅଧ୍ୟକ୍ଷାଙ୍କ ଦ୍ୱାରା ନିଆଯାଇଥିବା ନିଷ୍ପତ୍ତିକୁ ମଂଜୁରୀ ଦିଏ। ଏସବୁ ନିଷ୍ପତ୍ତିକୁ ଆବଶ୍ୟକତା ଅନୁସାରେ ଓ ଆର୍ଥିକ ସକ୍ଷମତା ଅନୁସାରେ କାର୍ଯ୍ୟକାରୀ କରେ।
  • ସଂଗଠନର ଲକ୍ଷ୍ୟ ହାସଲ ନିମନ୍ତେ ପାଣ୍ଠି ଯୋଗାଡ ଲାଗି ଯୋଜନା ଓ କାର୍ଯ୍ୟକ୍ରମ ପ୍ରସ୍ତୁତ କରେ।
  • “ମୋ’ ସ୍କୁଲ” ମୂଳ ଲକ୍ଷ୍ୟ ହାସଲ ଲାଗି ଆବଶ୍ୟକ ଅନ୍ୟ ସମସ୍ତ ପ୍ରକାରର କାର୍ଯ୍ୟ କରେ।
  • “ମୋ’ ସ୍କୁଲ ଅଭିଯାନ’ର ସଠିକ କାର୍ଯ୍ୟାନ୍ଵୟନ ପାଇଁ ପ୍ରଶାସନିକ ପରିଷଦ କାର୍ଯ୍ୟକାରୀ ନିର୍ଦ୍ଦେଶ, ଗାଇଡ୍‌ ଲାଇନ୍‌, ସର୍କୁଲାର୍‌, ସ୍ପଷ୍ଟୀକରଣ ଆଦି ଜାରି କରିପାରିବ।

"ମୋ' ସ୍କୁଲ" କାର୍ଯ୍ୟନିର୍ବାହୀ ପରିଷଦ

“ମୋ’ ସ୍କୁଲ” କାର୍ଯ୍ୟନିର୍ବାହୀ ପରିଷଦ (ଇସି) ସଂଗଠନର ନିତିଦିନିଆ କାର୍ଯ୍ୟ ପରିଚାଳନା କରେ। ଏହା ଏକ ରାଜ୍ୟସ୍ତରୀୟ କମିଟି (ଏସ୍‌ଏଲ୍‌ସି) ଭାବରେ କାର୍ଯ୍ୟକରେ। ସ୍କୁଲ ଓ ଗଣଶିକ୍ଷା ବିଭାଗର ପ୍ରମୁଖ ଶାସନ ସଚିବ କାର୍ଯ୍ୟନିର୍ବାହୀ ପରିଷଦର ଅଧ୍ୟକ୍ଷ।ସଂଗଠନର ସିଇଓ ଉପ-ସଭାପତି। ସେହିପରି ସ୍ୱତନ୍ତ୍ର ଦାୟିତ୍ୱ ଅଧିକାରୀ (ଓଏସ୍‌ଡି) ଇସିର ସଦସ୍ୟ ଆବାହକ ଭାବରେ କାମ କରନ୍ତି।

କାର୍ଯ୍ୟନିର୍ବାହୀ ପରିଷଦର ଅନ୍ୟ ସଦସ୍ୟମାନେ ହେଲେ ସଂଗଠନର ସିଓଓ, ନିର୍ଦ୍ଦେଶକ-ପ୍ରାଥମିକ ଶିକ୍ଷା, ନିର୍ଦ୍ଦେଶକ-ଟିଇ ଓ ଏସସିଇଆର୍‌ଟି (ଶିକ୍ଷକ ତାଲିମ ଓ ରାଜ୍ୟ ଶିକ୍ଷା ଗବେଷଣା ଓ ତାଲିମ ପରିଷଦ), ରାଜ୍ୟ ପ୍ରକଳ୍ପ ନିର୍ଦ୍ଦେଶକ-ଓସେପା, ଆର୍ଥିକ ଉପଦେଷ୍ଟା ଓ ମୁଖ୍ୟ ଲେଖା ଅଧିକାରୀ-ଓସେପା, ପୂର୍ତ୍ତ ବିଭାଗର ଅଧୀକ୍ଷଣ ଯନ୍ତ୍ରୀ।

ଇସିର ମନୋନୀତ ସଦସ୍ୟମାନେ ହେଲେ ଜଣେ ସ୍ଥପତି, ଜଣେ ଚଳଚ୍ଚିତ୍ର ନିର୍ମାତା, ଜଣେ ଶିକ୍ଷା ପଦ୍ଧତି ବିଶେଷଜ୍ଞ ଓ ଅଧ୍ୟକ୍ଷ/ସିଇଓଙ୍କ ଦ୍ୱାରା ମନୋନୀତ ଦୁଇଜଣ ଅନ୍ୟ ସଦସ୍ୟ, ଯେଉଁମାନେ କି ସ୍କୁଲ ଶିକ୍ଷା, କଳା, ସାହିତ୍ୟ, ଡିଜାଇନ୍‌, ବିଜ୍ଞାପନ, ବିଜ୍ଞାନ, ଇଂଜିନିୟରିଂ, ସାମାଜିକ କାର୍ଯ୍ୟ ଓ କ୍ରୀଡା ଓ ଅନ୍ୟ ବିଭିନ୍ନ କ୍ଷେତ୍ର ସହ ସଂପୃକ୍ତ ଥିବେ।

କାର୍ଯ୍ୟନିର୍ବାହୀ ପରିଷଦର ଭୂମିକା ଓ କାର୍ଯ୍ୟ ନିମ୍ନରେ ଦିଆଗଲା:

  • ଇସି ସଂଗଠନର ନିତିଦିନିଆ କାର୍ଯ୍ୟଗୁଡ଼ିକର ପରିଚାଳନା କରେ।
  • ସଂଗଠନର ସବୁ ବ୍ୟାପାର ଓ ପାଣ୍ଠିର ନିୟନ୍ତ୍ରଣ ଏବଂ ପରିଚାଳନା କରେ।
  • ପ୍ରତି ତିନିମାସରେ ଥରେ କିମ୍ବା ଆବଶ୍ୟକ ପଡିଲେ ଏକାଧିକ ଥର ଏହାର ବୈଠକ ବସେ।
  • ପ୍ରଶାସନିକ ପରିଷଦ (ଜିସି)ର ସବୁ ନିଷ୍ପତ୍ତିକୁ କାର୍ଯ୍ୟକାରୀ କରେ।
  • ସ୍କୁଲ ଓ ଗଣଶିକ୍ଷା ବିଭାଗ ସହିତ ସମନ୍ୱୟ ରଖି କାର୍ଯ୍ୟ କରେ।
  • ୩୦ଟି ଜିଲ୍ଲା ସ୍ତରୀୟ କମିଟି (ଡିଏଲ୍‌ସି) ସହିତ ସମନ୍ୱୟ ରଖି କାର୍ଯ୍ୟ କରେ ଏବଂ ପ୍ରଶାସନିକ ପରିଷଦ ଓ ଜିଲ୍ଲା ସ୍ତରୀୟ କମିଟି ମଧ୍ୟରେ ସଂଯୋଗ ରକ୍ଷା କରେ।
  • ପ୍ରକଳ୍ପ ପ୍ରସ୍ତାବ ଗୁଡ଼ିକର ସମୀକ୍ଷା କରେ ଏବଂ ପ୍ରକଳ୍ପ ଗୁଡ଼ିକୁ ଡିଏଲ୍‌ସିକୁ ପ୍ରେରଣ କରେ।
  • ମୋ ସ୍କୁଲ ଅଭିଯାନର ସଠିକ କାର୍ଯ୍ୟାନ୍ୱୟନ ପାଇଁ ଡିଏଲ୍‌ସି ସହିତ ସମନ୍ୱୟ ରକ୍ଷା କରେ।
  • ନିର୍ଦ୍ଦିଷ୍ଟ ପ୍ରକଳ୍ପ ଉପରେ ବାର୍ଷିକ କାର୍ଯ୍ୟକାରୀ ଯୋଜନା ପ୍ରସ୍ତୁତ କରେ ଏବଂ ତିନିମାସିଆ ଲକ୍ଷ୍ୟ ଧାର୍ଯ୍ୟକରେ। ତା’ପରେ ସେଗୁଡ଼ିକ ପ୍ରଶାସନିକ ପରିଷଦର ମଂଜୁରୀ ପାଇଁ ପଠାଯାଏ।

"ମୋ' ସ୍କୁଲ" ଜିଲ୍ଲାସ୍ତରୀୟ କମିଟି

ଓଡ଼ିଶାରେ ୩୦ଟି ଜିଲ୍ଲା ରହିଛି। ପ୍ରତି ଜିଲ୍ଲାରେ ମୋ ସ୍କୁଲ ଜିଲ୍ଲା ସ୍ତରୀୟ କମିଟି ରହିଛି। ଜିଲ୍ଲାପାଳ ଏହାର ଅଧ୍ୟକ୍ଷ। ଜିଲ୍ଲା ଶିକ୍ଷା ଅଧିକାରୀ ଏହାର ସଦସ୍ୟ ଆବାହକ।

ଡିଏଲ୍‌ସିରେ ଥିବା ଅନ୍ୟ ସଦସ୍ୟମାନେ ହେଲେ ଜିଲ୍ଲା ପ୍ରକଳ୍ପ ସଂଯୋଜକ-ସର୍ବ ଶିକ୍ଷା ଅଭିଯାନ, ଜିଲ୍ଲା ଶିକ୍ଷା ଓ ତାଲିମ ପ୍ରତିଷ୍ଠାନ(ଡିଆଇଇଟି)ର ଅଧ୍ୟକ୍ଷ,ଜଣେ ବ୍ଲକ ଶିକ୍ଷା ଅଧିକାରୀ (ବିଇଓ), ସ୍କୁଲ ପରିଚାଳନା ଓ ଉନ୍ନୟନ ପରିଷଦ (ଏସ୍‌ଏମ୍‌ଡିସି)ର ଦୁଇଜଣ ନାଗରିକ ସଦସ୍ୟ।

ଡିଏଲ୍‌ସିର ମନୋନୀତ ସଦସ୍ୟମାନେ ହେଲେ ଜଣେ ସ୍ଥପତି, ମୋ ସ୍କୁଲ ଦ୍ୱାରା ମନୋନୀତ ଜଣେ ଚଳଚ୍ଚିତ୍ର ନିର୍ମାତା, ଜିଲ୍ଲାପାଳଙ୍କ ଦ୍ୱାରା ମନୋନୀତ ଦୁଇଜଣ ଅନ୍ୟ ସଦସ୍ୟ, ଯେଉଁମାନେ ସ୍କୁଲ ଶିକ୍ଷା, କଳା, ସାହିତ୍ୟ, ଡିଜାଇନ, ବିଜ୍ଞାପନ, ବିଜ୍ଞାନ, ଇଂଜିନିୟରିଂ, ସାମାଜିକ କାର୍ଯ୍ୟ ଓ କ୍ରୀଡା ଓ ଅନ୍ୟ ବିଭିନ୍ନ କ୍ଷେତ୍ର ସହ ସଂପୃକ୍ତ ଥିବେ।

ଡିଏଲ୍‌ସିର ଭୂମିକା ଓ କାର୍ଯ୍ୟ ନିମ୍ନରେ ଦିଆଗଲା:

  • ଡିଏଲ୍‌ସି ଜିଲ୍ଲା ଶିକ୍ଷା ଅଧିକାରୀ, ବ୍ଲକ ଶିକ୍ଷା ଅଧିକାରୀ, ପୁରାତନ ଛାତ୍ରସଂଘ ଓ ଅନ୍ୟ ସ୍ଥାନୀୟ ସଂସ୍ଥାମାନଙ୍କ ସହଯୋଗରେ ପୁରାତନ ଛାତ୍ରଛାତ୍ରୀମାନଙ୍କୁ ଏକତ୍ରିତ କରେ ଏବଂ ସଚେତନତା ଅଭିଯାନ ଆୟୋଜନ କରେ।
  • ସ୍କୁଲର ପୁରାତନ ଛାତ୍ରଛାତ୍ରୀ ଓ ଅନ୍ୟମାନଙ୍କଠାରୁ ପାଣ୍ଠି ସଂଗ୍ରହ ଏବଂ ଅନ୍ୟ ସହାୟତା ତଥା ସହଯୋଗ ପାଇବା ପାଇଁ ସ୍କୁଲ ପ୍ରଧାନଶିକ୍ଷକ/ଶିକ୍ଷୟିତ୍ରୀଙ୍କ ସହ ଯୋଗାଯୋଗ ରଖେ।
  • ସ୍ଥାନୀୟ ସ୍କୁଲ ପ୍ରଧାନଶିକ୍ଷକ/ଶିକ୍ଷୟିତ୍ରୀଙ୍କ ସହାୟତାରେ ଜରୁରୀ ଡାଟାବେସ୍‌ ପ୍ରସ୍ତୁତ କରେ।
  • ଦାତାମାନଙ୍କ ତାଲିକା ଓ ସବିଶେଷ ପ୍ରକଳ୍ପ ପ୍ରସ୍ତାବ କାର୍ଯ୍ୟନିର୍ବାହୀ ପରିଷଦର ମଂଜୁରୀ ଓ ସରକାରଙ୍କ ଅନୁଦାନ ପାଇଁ ପ୍ରେରଣ କରେ।
  • ଦାତାଙ୍କ ଇଚ୍ଛାନୁସାରେ ପ୍ରକଳ୍ପର ଉପଯୁକ୍ତ କାର୍ଯ୍ୟାନ୍ୱୟନ ପାଇଁ ସକ୍ରିୟ ପଦକ୍ଷେପ ଗ୍ରହଣ କରେ।
  • ଇସିର ନିର୍ଦ୍ଦେଶ ଓ ସୁପାରିଶକ୍ରମେ ଜିଲ୍ଲାର ସବୁ ଅଞ୍ଚଳରେ ଯେପରି ମୋ ସ୍କୁଲ ଅଭିଯାନ ଠିକଭାବରେ କାର୍ଯ୍ୟକାରୀ ହୋଇପାରିବ ତାହା ନିଶ୍ଚିତ କରେ।
  • ଡିଏଲ୍‌ସି ମୋ ସ୍କୁଲ ସମ୍ବିଧାନ ଅନୁସାରେ ଆବଶ୍ୟକ ଥିବା କୌଣସି ପ୍ରକଳ୍ପକୁ ଇସିର ପରାମର୍ଶକ୍ରମେ କାର୍ଯ୍ୟକାରୀ କରେ।

"ମୋ' ସ୍କୁଲ" ପରାମର୍ଶଦାତା ପରିଷଦ

ସରକାରଙ୍କ ମଂଜୁରୀକ୍ରମେ ପ୍ରଶାସନିକ ପରିଷଦ ମୋ ସ୍କୁଲ ପରାମର୍ଶଦାତା ପରିଷଦକୁ ପାଞ୍ଚଜଣ ବ୍ୟକ୍ତିଙ୍କୁ ମନୋନୀତ କରିପାରିବ। ଏମାନଙ୍କ କାର୍ଯ୍ୟକାଳ ୩ ବର୍ଷ ରହିବ। ଏହି ସଦସ୍ୟମାନେ ଶିକ୍ଷା, କଳା, ସାହିତ୍ୟ, ଡିଜାଇନ, ବିଜ୍ଞାପନ, ବିଜ୍ଞାନ, ଇଂଜିନିୟରିଂ, ସାମାଜିକ କାର୍ଯ୍ୟ ଏବଂ କ୍ରୀଡା ଓ ଅନ୍ୟ ବିଭିନ୍ନ କ୍ଷେତ୍ର ସହ ସଂପୃକ୍ତ ଥିବେ।

ମୋ ସ୍କୁଲ ପରାମର୍ଶଦାତା ପରିଷଦକୁ ଦୁଇଜଣ ବିଶିଷ୍ଟ ବ୍ୟକ୍ତିଙ୍କୁ ମନୋନୀତ କରାଯାଇଛି।

    • ଡକ୍ଟର ଯତୀନ୍ଦ୍ର କୁମାର ନାୟକ,

      ଶିକ୍ଷାବିତ୍‌ ଓ ସାହିତ୍ୟିକ

ଡକ୍ଟର ଯତୀନ୍ଦ୍ର କୁମାର ନାୟକ ଜଣେ ସୁପରିଚିତ ଶିକ୍ଷାବିତ୍‌ ଓ ସାହିତ୍ୟିକ। ଓଡିଆରୁ ଇଂରାଜୀକୁ ଅନୁବାଦ, ସାହିତ୍ୟ ସମାଲୋଚନା, ବିଭିନ୍ନ ସ୍ତମ୍ଭ ରଚନା ଏବଂ ସମ୍ପାଦନ କ୍ଷେତ୍ରରେ ସେ ସୁପରିଚିତ। ସେ କଟକର ରେଭେନ୍‌ସା କଲେଜରେ ଶିକ୍ଷାଲାଭ କରିଥିଲେ ଏବଂ ପରେ ଅକ୍‌ସ୍‌ଫୋର୍ଡ୍‌ ବିଶ୍ବବିଦ୍ୟାଳୟରୁ ଡକ୍ଟରେଟ୍‌ କରିଥିଲେ। ସେ ଉତ୍କଳ ବିଶ୍ବବିଦ୍ୟାଳୟରେ ସ୍ନାତକୋତ୍ତର ଛାତ୍ରଛାତ୍ରୀମାନଙ୍କୁ ଇଂରାଜୀ ସାହିତ୍ୟ ପଢାଉଥିଲେ। ଅନୁବାଦ ସାହିତ୍ୟର ପ୍ରସାର ପାଇଁ ଡକ୍ଟର ନାୟକ ‘ରୂପାନ୍ତର’ ନାମକ ଏକ ସଂସ୍ଥା ସ୍ଥାପନ କରିଛନ୍ତି। ‘ରୂପାନ୍ତର’ ବହୁ ଓଡିଆ ପୁସ୍ତକକୁ ଇଂରାଜୀରେ ଅନୁବାଦ କରିସାରିଛି।


    • ଶ୍ରୀମତୀ ନିବେଦିତା ସ୍କଡର୍‌,

      ଶିକ୍ଷାବିତ୍‌ ଓ ଏନ୍‌ଜିଓ ମୁଖ୍ୟ

ଶ୍ରୀମତୀ ନିବେଦିତା ସ୍କଡର୍‌ ରିଷିଭ୍ୟାଲି ସ୍କୁଲ୍‌ର ପ୍ରାକ୍ତନ ପ୍ରଧାନ ଶିକ୍ଷୟିତ୍ରୀ। ଜଣେ ବିଶିଷ୍ଟ ଶିକ୍ଷାବିତ୍‌ ଭାବରେ ସେ ଉତ୍କଳ ବିଶ୍ବବିଦ୍ୟାଳୟରୁ ବିଏଡ୍‌ ଓ ଏମ୍‌ଏଡ୍‌ କରିଥିଲେ। ଅଷ୍ଟ ଦଶକର ଆରମ୍ଭରେ ସେ ବିଶାଖାପାଟଣାର ଟିମ୍ପାନି ସ୍କୁଲ୍‌ରେ ଶିକ୍ଷାଦାନ ଆରମ୍ଭ କରିଥିଲେ। ପରେ ରିଷିଭ୍ୟାଲି ସ୍କୁଲରେ ଯୋଗ ଦେଇଥିଲେ। ସେଇ ବିଦ୍ୟାଳୟରେ ୧୨ ବର୍ଷ ଶିକ୍ଷକତା କରିବା ପରେ ୧୯୯୭ ରୁ ୧୯୯୯ ପର୍ଯ୍ୟନ୍ତ ସେ ସ୍କୁଲ୍‌ର ପ୍ରଧାନ ଶିକ୍ଷୟିତ୍ରୀ ଥିଲେ। ୨୦୦୦ ମସିହାରୁ ସେ ବେସରକାରୀ ଅନୁଷ୍ଠାନ ‘ଉନ୍ନୟନ’ର ଅଧ୍ୟକ୍ଷା ରୂପେ କାର୍ଯ୍ୟରତ। ‘ଉନ୍ନୟନ’ ଅନୁନ୍ନତ ସମ୍ପ୍ରଦାୟଙ୍କ ସ୍ଥାୟୀ ବିକାଶ ପାଇଁ ସତତ କାର୍ଯ୍ୟ କରି ଚାଲିଛି।

"ମୋ' ସ୍କୁଲ" ଟିମ୍‌ ପରିଚୟ

ଓଡ଼ିଶାର ସାହିତ୍ୟ ଜଗତରେ ଶ୍ରୀମତୀ ସୁସ୍ମିତା ବାଗ୍‌ଚୀ ଏକ ପରିଚିତ ନାମ। ଓଡ଼ିଶା ପୋଲିସ ହାଇସ୍କୁଲରୁ ମ୍ୟାଟ୍ରିକ୍‌ ପାସ୍‌ କରିଥିବା ସୁସ୍ମିତାଙ୍କର ଏକ ଉଲ୍ଲେଖନୀୟ ସ୍କୁଲ ଓ କଲେଜ କ୍ୟାରିୟର୍‌ ରହିଥିଲା। ଦିଲ୍ଲୀ ବିଶ୍ୱବିଦ୍ୟାଳୟରୁ ରାଜନୀତି ବିଜ୍ଞାନରେ ଏମଏ ପାସ୍‌ କରିବା ପରେ ସେ ଦିଲ୍ଲୀର ଦୌଲତ ରାମ କଲେଜରେ ଅଧ୍ୟାପନା ଜୀବନ ଆରମ୍ଭ କରିଥିଲେ। ଏହାପରେ ସେ ସାହିତ୍ୟ ଜଗତକୁ ନିଜର ସବୁ ସମୟ ଦେବା ଆରମ୍ଭ କଲେ। ଏଥି ସହିତ ପ୍ରାୟ ତିନି ଦଶନ୍ଧି ଧରି ଓଡ଼ିଶାର ଲୋକପ୍ରିୟ ପତ୍ରିକା ‘ସୁଚରିତା’ର ସହକାରୀ ସମ୍ପାଦକ ଭାବେ ସେ କାର୍ଯ୍ୟ କରୁଥିଲେ। ସେ ୧୮ଟି ପୁସ୍ତକ ଲେଖିଛନ୍ତି। ଏଗୁଡ଼ିକ ମଧ୍ୟରେ ରହିଛି କ୍ଷୁଦ୍ରଗଳ୍ପ ସଂକଳନ, ଉପନ୍ୟାସ ଓ ଭ୍ରମଣକାହାଣୀ। ତାଙ୍କ ଲିଖିତ ପୁସ୍ତକ ବିଭିନ୍ନ ଭାରତୀୟ ଭାଷା ଯଥା ମରାଠୀ, ତେଲୁଗୁ, କନ୍ନଡ, ମାଲାୟଲମ୍‌, ହିନ୍ଦୀ ଓ ଇଂରାଜୀ ଭାଷାରେ ଅନୁବାଦିତ ହୋଇ ପ୍ରକାଶିତ ହୋଇଛି। ସେ ଓଡ଼ିଶା ସାହିତ୍ୟ ଏକାଡେମୀ ପୁରସ୍କାର, ପ୍ରଜାତନ୍ତ୍ର ବିଷୁବ ପୁରସ୍କାର, ଉତ୍କଳ ସମ୍ମାନ, ଗଙ୍ଗାଧର ରଥ ଫାଉଣ୍ଡେସନ ପୁରସ୍କାର ଆଦି ବିଭିନ୍ନ ପୁରସ୍କାର ଓ ସମ୍ମାନରେ ସମ୍ମାନିତ ହୋଇଛନ୍ତି। ମୋ ସ୍କୁଲ ଅଭିଯାନରେ ନିଜର ସମ୍ପୂର୍ଣ୍ଣ ସମୟ ଦେବା ସହ ସୁସ୍ମିତା ବାଗଚୀ ମାନସିକ ସ୍ୱାସ୍ଥ୍ୟ, ଦୃଷ୍ଟିହୀନତା ଓ ବୟସ୍କ ସେବା ଆଦି ସାମାଜିକ କ୍ଷେତ୍ରରେ ସକ୍ରିୟ ଅଛନ୍ତି। "ମୋ' ସ୍କୁଲ ଅଭିଯାନ"ରେ ଅନ୍ତର୍ଭୁକ୍ତ ହେବାଦ୍ୱାରା ତାଙ୍କୁ ନିଜ ମାତୃଭୂମିର ସେବା କରିବାକୁ ସୁଯୋଗ ଓ ସୌଭାଗ୍ୟ ମିଳିଛି ବୋଲି ସେ ବିଶ୍ୱାସ କରନ୍ତି।
ଶ୍ରୀ ଭୁପେନ୍ଦ୍ର ସିଂ ପୁନିଆ ଭୂଗୋଳରେ ସ୍ନାତକୋତ୍ତର ଡିଗ୍ରୀ ହାସଲ କରିବା ପରେ ୨୦୦୮ ମସିହାରେ ଭାରତୀୟ ପ୍ରଶାସନିକ ସେବାରେ ଯୋଗ ଦେଇଥିଲେ। ଏହି ଓଡ଼ିଶା କ୍ୟାଡର୍‌ ଅଫିସର୍‌ ବିଭିନ୍ନ ବିଭାଗରେ ସଫଳତାର ସହ କାର୍ଯ୍ୟ କରିଛନ୍ତି। ବିଭିନ୍ନ ସାମାଜିକ ପ୍ରକଳ୍ପକୁ ସୁନ୍ଦର ଭାବରେ କାର୍ଯ୍ୟକାରୀ କରିବା ନେଇ ତାଙ୍କର ସୁନାମ ରହିଛି। ବିଶେଷକରି କନ୍ଧମାଳ, ସୁନ୍ଦରଗଡ଼ ଓ ଢେଙ୍କାନାଳ ଜିଲ୍ଲାପାଳ ଭାବେ ଅବସ୍ଥାପିତ ଥିବାବେଳେ ତାଙ୍କର ଅଭିନବ କାର୍ଯ୍ୟ ପାଇଁ ସେ ବହୁ ପ୍ରଶଂସିତ ହୋଇଛନ୍ତି। ଓଡ଼ିଶା ରାଜ୍ୟ ଶିକ୍ଷା କାର୍ଯ୍ୟକ୍ରମ ପ୍ରାଧିକରଣ (ଓଏସଇପିଏ)ର ରାଜ୍ୟ ପ୍ରକଳ୍ପ ନିର୍ଦ୍ଦେଶକ ଭାବରେ ସେ ନିଜର ନେତୃତ୍ୱ ଦକ୍ଷତାର ସହିତ ପ୍ରଦର୍ଶନ କରି ସମଗ୍ର ଶିକ୍ଷା ଓ ନୀତି ଆୟୋଗର ସଷ୍ଟେନେବଲ ଆକ୍ସନ ଫର ଟ୍ରାନ୍ସଫର୍ମିଂ ହ୍ୟୁମାନ କ୍ୟାପିଟାଲ (ସାଥ୍‌) ଅଧୀନରେ ଥିବା ବିଭିନ୍ନ କାର୍ଯ୍ୟକ୍ରମର ପ୍ରଭାବଶାଳୀ ସମ୍ପାଦନ କରିଛନ୍ତି।
ଶ୍ରୀ ଅମରଜିତ ଜେନାଙ୍କର ବିଭିନ୍ନ ଉନ୍ନୟନମୂଳକ କାର୍ଯ୍ୟ କ୍ଷେତ୍ରରେ ଦୀର୍ଘ ୨୭ ବର୍ଷର ଅଭିଜ୍ଞତା ରହିଛି। ରାଜ୍ୟ, ଜାତୀୟ ଓ ଅନ୍ତର୍ଜାତୀୟ ସଂସ୍ଥାମାନଙ୍କ ପାଇଁ ସେ ବହୁ ଯୋଜନା ପ୍ରସ୍ତୁତ କରିଛନ୍ତି। ୟୁନିସେଫ୍‌ରେ ଶିକ୍ଷା ଅଧିକାରୀ ଭାବେ (୨୦୦୮-୧୩) କାର୍ଯ୍ୟ କରୁଥିବା ସମୟରେ ସେ ଓଡ଼ିଶା ସରକାରଙ୍କ ସହ କାର୍ଯ୍ୟ କରି ସ୍କୁଲ ଓ ଗଣଶିକ୍ଷା ବ୍ୟବସ୍ଥାକୁ ଶିଶୁ ଅନୁକୂଳ କରିବାରେ ନିଜର ଯୋଗଦାନ ଦେଇଥିଲେ। ସେହିପରି ଟେସ ଇଣ୍ଡିଆ (ସ୍କୁଲ ଭିତ୍ତିକ ସହାୟତା ମାଧ୍ୟମରେ ଶିକ୍ଷକ ତାଲିମ) ରେ ଓପନ୍‌ ୟୁନିଭର୍ସିଟି, ୟୁକେ ଓ ବ୍ରିଟିଶ୍‌ କାଉନସିଲ୍‌ ସହିତ କାମ କରି ସେ ଶିଶୁ-କୈନ୍ଦ୍ରିକ ଶିକ୍ଷାଦାନ କୌଶଳକୁ କାର୍ଯ୍ୟକାରୀ କରିବା ଏବଂ ବିଭିନ୍ନ ମୁକ୍ତ ସମ୍ବଳ, ଅନ୍‌ଲାଇନ୍‌ ଶିକ୍ଷାଦାନ ଓ ସୋସିଆଲ ମିଡିଆ ମାଧ୍ୟମରେ ଶିକ୍ଷାଗ୍ରହଣକୁ ପ୍ରୋତ୍ସାହିତ କରିବା ଦିଗରେ ସେ ନେତୃତ୍ୱ ଗ୍ରହଣ କରିଥିଲେ। ଏହା ପୂର୍ବରୁ ସ୍କୁଲ ପିଲାଙ୍କ ମଧ୍ୟରେ ବିଜ୍ଞାନକୁ ଲୋକପ୍ରିୟ କରିବା ଲକ୍ଷ୍ୟରେ ସେ ବିଭିନ୍ନ ବିଜ୍ଞାନ ଭିତ୍ତିକ ଜନ-ଅଭିଯାନ ଗୁଡ଼ିକରେ ସକ୍ରିୟ ଭାବେ ଅଂଶଗ୍ରହଣ କରିଥିଲେ। ଜାତୀୟ ସାକ୍ଷରତା ମିଶନ୍‌ର ଜଣେ ପରାମର୍ଶଦାତା ଭାବେ ସେ ଓଡ଼ିଶା ଓ ବିହାରରେ ସଂପୂର୍ଣ୍ଣ ସାକ୍ଷରତା ଅଭିଯାନକୁ କାର୍ଯ୍ୟକାରୀ କରିବା କ୍ଷେତ୍ରରେ ମଧ୍ୟ କାମ କରିଥିଲେ ।
ଶ୍ରୀମତି ପ୍ରତିଭା ଦୋରା, ଓଡ଼ିଶା ପ୍ରଶାସନିକ ସେବା କ୍ୟାଡ଼ର (୧୯୯୭ ବ୍ୟାଚ)ର ଜଣେ ଅଧିକାରୀ।ସେ ତାଙ୍କର ଆନ୍ତରିକତା , ଅଖଣ୍ଡତା ଏବଂ ଦଳଗତ କାର୍ଯ୍ୟ ପାଇଁ ପରିଚିତ। ତାଙ୍କର କୋଡିଏ ବର୍ଷ ସେବା କାଳରେ ସେ ତହସିଲଦାର, ଡେପୁଟି କଲେକ୍ଟର, ଜମି ଅଧିଗ୍ରହଣ ଅଧିକାରୀ, ଜିଲ୍ଲା ଗ୍ରାମ୍ୟ ଉନ୍ନୟନ ଏଜେନ୍ସିର ଅତିରିକ୍ତ ପ୍ରକଳ୍ପ ନିର୍ଦ୍ଦେଶକ ତଥା ଅନ୍ୟାନ୍ୟ କାର୍ଯ୍ୟ ସଫଳତାର ସହ ସମ୍ପାଦନ କରିଛନ୍ତି। ଏହା ବ୍ୟତୀତ ସେ ଜିଲ୍ଲା ସମାଜ କଲ୍ୟାଣ ଅଧିକାରୀ, ମ୍ୟୁନିସିପାଲିଟି କାର୍ଯ୍ୟନିର୍ବାହୀ ଅଧିକାରୀ, ଜିଲ୍ଲା ଯୋଗାଣ ଅଧିକାରୀ, ଜିଲ୍ଲା ଜରୁରୀ କାଳୀନ ଅଧିକାରୀ ତଥା ପ୍ରକଳ୍ପ ସଂଯୋଜକ, ସର୍ଵ ଶିକ୍ଷା ଅଭିଯାନର କାର୍ଯ୍ୟ ମଧ୍ୟ ସୁଚାରୁ ରୂପେ ସମ୍ପନ୍ନ କରିଛନ୍ତି । ଶ୍ରୀମତୀ ଦୋରା ସମ୍ବଲପୁର ବିଶ୍ୱବିଦ୍ୟାଳୟରୁ ଜୀଵ ବିଜ୍ଞାନରେ ସ୍ନାତକୋତ୍ତର ଡିଗ୍ରୀ ସଫଳତାର ସହ ହାସଲ କରିଛନ୍ତି।
"ମୋ' ସ୍କୁଲ ଅଭିଯାନ'ର ପ୍ରକଳ୍ପ ଅଧିକାରୀ ଶ୍ରୀ ପ୍ରଶାନ୍ତ କୁମାର ରଥଙ୍କର ଓଡ଼ିଶାରେ ଶିକ୍ଷକ ପ୍ରଶିକ୍ଷଣ ତାଲିମ କ୍ଷେତ୍ରରେ ଅନେକ ବର୍ଷର ଅଭିଜ୍ଞତା ରହିଛି। ସେ ଜିଲ୍ଲା ଶିକ୍ଷା ଓ ପ୍ରଶିକ୍ଷଣ ତାଲିମ ପ୍ରତିଷ୍ଠାନ (ଡିଆଇଇଟି)ରେ ଜଣେ ଶିକ୍ଷକ ଅଧ୍ୟାପକ ଭାବରେ କାମ କରିଛନ୍ତି ଏବଂ ଓଡ଼ିଶାରେ ଜନଶାଳା କାର୍ଯ୍ୟକ୍ରମ, ଜିଲ୍ଲା ପ୍ରାଥମିକ ଶିକ୍ଷା କାର୍ଯ୍ୟକ୍ରମ (ଡିପିଇପି), ସମସ୍ତଙ୍କ ପାଇଁ ଶିକ୍ଷା (ଇଏଫଏ) ଓ ସର୍ବ ଶିକ୍ଷା ଅଭିଯାନ (ଏସଏସଏ)ରେ ନିଜର ଯୋଗଦାନ ଦେଇଛନ୍ତି । ପରବର୍ତ୍ତୀ କାଳରେ ତାଙ୍କୁ ବରିଷ୍ଠ ଅଧ୍ୟାପକ ଭାବରେ ପଦୋନ୍ନତି ଦିଆଯାଇଥିଲା। ସେ ରାଜ୍ୟ ସମ୍ବଳ ଗୋଷ୍ଠୀ (ଏସ୍‌ ଆର୍‌ ଜି)ରେ ଜଣେ ସଦସ୍ୟ ଭାବରେ କାମ କରିଛନ୍ତି। ସେ ମଧ୍ୟ ଏମ୍‌ଏଚ୍‌ଆର୍‌ଡି, ଏନସିଇଆରଟି, ଏନୟୁଇପିଏ, ଟିଇ ଏଣ୍ଡ ଏସସିଇଆରଟି, ଓପେପା ଆଦି ଦ୍ୱାରା ଆୟୋଜିତ ବିଭିନ୍ନ ରାଜ୍ୟସ୍ତରୀୟ, ଜାତୀୟ ଓ ଅନ୍ତର୍ଜାତୀୟ ସ୍ତରର କର୍ମଶାଳାରେ ସକ୍ରିୟ ଭାବେ ଅଂଶଗ୍ରହଣ କରିଛନ୍ତି। ୨୦୧୩ରେ ଲଣ୍ଡନର ଆଇଓଇରେ ଅନୁଷ୍ଠିତ ସ୍କୁଲସ୍ତରୀୟ ଅନ୍ତର୍ଜାତୀୟ କର୍ମଶାଳା ସେ ଯୋଗ ଦେଇଥିଲେ। ସେ ରେଭେନ୍ସା ବିଶ୍ୱବିଦ୍ୟାଳୟରୁ ଓଡ଼ିଆରେ ଏମ୍‌.ଏ ଡିଗ୍ରୀ ଓ ରାଧାନାଥ ଆଇଏଏସଇରୁ ଏମ୍‌ଏଡ୍‌ ଡିଗ୍ରୀ ହାସଲ କରିଛନ୍ତି। ଏହି ଶିକ୍ଷା ଓ ଅଭିଜ୍ଞତା ବଳରେ ସେ ଓଡ଼ିଶାର ଶିକ୍ଷା ସେବା (ଓଇଏସ-୨,ଡିଆଇଇଟି କ୍ୟାଡର୍‌) କ୍ଷେତ୍ରରେ ଜଣେ ଅଭିଜ୍ଞ ତାଲିମଦାତା ଓ ପ୍ରଶାସକ ଭାବେ ପରିଚୟ ହାସଲ କରିଛନ୍ତି ।
top
top